LEMELERVELD – Dur bint noe un bult luu die probleem hebt met ut hoge water watter noe vake is. Ai un weiland hebt waoj peerden int wult jaagn, muj ok zurgn det de aofrastering goed is. Aans lup ut spul zo  de weg op of ens aans. Dur waarn hier en daor wat boomn umme weit en die laagn boom op de aofrastering.

Noe mos ut draod deure knipt wurn um ut dan onder de boom uut te roppen en dan weer an mekare knuppen. Ut zol mooier ween ast op un lasse int draod lusse maakt kon wurn. Want asse ut draod deur knipt, kriege ut niet weer an mekare. Ja un ander stuk draod kan dan wel natuurluk, mar un lasse lus maakn zol better ween. Noe woln un paar kerls met un auto langs de rikken rien en zo alles controleern.  Mar deur ut hoge water wast weiland aorig nat en ja heur ens midden int land kwaam ze vaste te zitn. Dus toen moster un trekker oppehaalt wurn.  Gelukkig wat niet al te verre loopn um de trekker op te haaln en dus kon ze de auto rap uut de modderige pruttel wegtrekn. Met de bienewaagn mossen ze noe alle gereedschapn met slepn en dan ut hele land rondloopn um te kiekn of alles nog goed was.  Die bienewaagn kwaamp niet vaste te zitn. In un ander stuk weiland waor linten in plaaste van draod as aofrastering was gebruukt. Daor laagn die linten ok hier en daor plat an de grond en peerden die daor leupn gung dan ok buutn ut weiland kiekn watter nog meer te bekiekn was.Dus daor mos ut lint hier en daor anne spant wurn en better an de paoln. Um dur goed stroom op te kriegn, moster ok goed deurverbun wurn. Toen alles trechte was, kon dur weer stroom op en bleem de peerden int weilland.

Ton