LEMELERVELD – Assie iemand bint die vake iets kwiet is, dan kant gebeurn dei weer un keer oe de heure uut de kop wult trekn, umdei niet meer weet waor offie iets elaotn hebt. Ai dan ok nog saam woont met oen olders, dan geefie automatisch  hun de schuld dei oen pruttel weer kwiet bint. De olders gaot oe helpn um ut hele huus op de kop te zetn um  ut verleurn diggie boom water te kriegn.

Tja ie bint vanwege det gemis un machtig stuk chagrijn ewurn en niet meer te genietn in huus. Oen olders baalt daorvan en wult det ut gechagerijn offe loopn is, deurum helpt ze oe zuukn. Asse  a un hele tied overal ekeekn hebt, zegt ze dan det ut vanzelf wel weer boom water kump. Maarja dan muj genog geduld hem en daor is un gebrek an. Dus blef de stemming echt waardeloos en det is niet best veur de sfeer in huus. As ut diggue dan later inderdaad terugge fun is, vrug ien van de olders waor ut noe lag. As ut op de slaopkamer van de sloddervos lag, gef die toch an dette wel tien keer daor ekeekn hef en niks ezene hef. Det ut toch daor lag is onverklaarbaar en ut  is dan ok deur iemand anders daor nerelegt. Tja iemand anders hef ut ait edaone. Mar umdet ut weer efun is, is de sfeer noe better zonder det gechagerijn.

Ton