DALSEN – Oons veurige huus was een 2-onder-een-kap woning, die wi-j dus deelden met oonze merakel beste buur’n. Wi-j hadden toen een kear een ni-je PVC vloere in de woonkamer e-legt. 2 weak’n later woll’n de buur’n die bie oons onder de kappe woont, ok een ni-je vloere legg’n in de woonkamer.

“Hendrik, oonze vloere en oe vloere bint eam groot;  hoeveulle pakken pvc heb jullie e-kocht veur de vloere?” Ik zegge; “ 21 pak “.

3 daag’n later was hi-j alweer bie mie. Ik vroag, “hej de vloere der al in?” “Ja, mar ik snap der niks van, want wi-j hadden 5 pak oaver  en wi-j hebt dezelfde vloeroppervlakte as jullie”. Ik zeg, “ det klopt, wi-j hadden ook 5 pak oaver”.

Mien ni-je buurman repareert zien auto met behulp van zo’n buukie, zo’n Autovraagbaak, mar volgens mie en as ik de zo heure van een afstand, stoat doar de eerste vief bladzijdes alleen maar krachttermen in, in plaats van aanhaalmoment’n…

Volgens mien buurvrouwe snurkt denzelfde buurman nogal. De buurvrouwe zegt teeg’n hum; “ie snurkt zo machtig hard, ik kan der niet van sloap’n, ik geleuve det better is det ik noar de logeerkamer verhuuze”.  “Nou” zeg de buurman, ”a-k zeker wist det dat helpt, dan kom ik bie oe ligg’n.”

Laast vrög mi-j iemand: “Hendrik, ie eat altied zoveulle gruunte, bin ie soms vegetarisch?” Ik zegge; “ ik bin veur een darde deel vegetarisch: Ik heb namelijk altied  1 deel eerdappel, 1 deel vleis en 1 deel gruunte op mien bord.

En zo schoeve wi-j al zo weer noar het ende van de tweede wekke van meert. Gelukkig he’w eindelijk  een bettie mooi weer. Was ie die reeg’n ok zo zat? Ikke weh.

Nou luu, doet kalm an, ie heurt weer van mie!

Gegroet,

Hendrik van de Steege