LEMELERVELD – Bie un bedrief mossen dur raamn elapt wurn en twas an de buutenkante. Noe mossen de kozien glieke mee enum wurn. Ut waarn raamn waorie nie bie kon, dus mossie un trappie of un ledder hem.

Ja un helicopter zol ok kun, mar dan konnie niet dicht genog durbie kom um det waj wult doen ok echt te doen. Noe mar op zuuk opt bedrief nor un goeie ledder. En natuurluk, zo aj wel vaker metmaakt, aj iets neudig hebt lig ut niet op de vaste plaatse. Eindeluk hei dan un ledder efun. Noe wult geval det veur ut gebouw met de raamn stiet un transformatorhuussie. Ie mun dus eerst op det huussie kroepn um bie die raamn te komn. Enkele van die raamn koj vanaf ut dak vant huussie mooi bie, mar andern daorvan stond ut huussie te verre aof. Deurum moster tussen ut huussie ent gebouw un ledder gebruukt wurn. Met al det rondloopn um de goeie spuln bie menare te kriegn komme ie ok nog un vouwledder teegn. Daor kuj dan mooi mee opt huussie klimn en dan de ledder tussen ut  huussie ent gebouw gebruukn. Zo hoefie niet steeds weer hen en weer te klimn, mar kuj zo vanaf ut dak vant huussie op de ledder stapn. Aj dan oen schoonmaakpruttel durbie hebt kuj ant poetsen van de raamn en kozien.

Ton