DALSEN – Vrogger toen ik net ut ri-jbewies had, en natuurlijk nog mar net 18 joar was ( wat ko’j doar noar uutkiek’n toen!), had ik mar net an geld veur een olde auto van een paar honderd guld’n. Mar het was geweldig de’j zelf een auto hadd’n, want oen actieradius wönn’n beheurlijk groter. En ie könn’n in de winter en as ut reeg’n, dreuge oaverkomm’n.

Mar ja. zo’n auto van een paar honderd guld’n, was natuurlijk niet de beste, dus der mos nog wel eens an e-sleuteld word’n. Dan waren de contactpunties van de ontsteking versleten, dan lekken de waterpompe enzovoort. Op een keer trappen ik zelfs dwars deur de rem hen. Gelukkig kon ik nog met de handrem op tied stoppen veur een krusing. En de roestduvel stund ok niet stille bi-j zukke oale auto’s. Die auto had een paar grote gaten in de boadem, det as ik deur een plasse reed, ie de voeten nat hadd’n. Mar as der dan weer APK was, dan mossen de gaten wel dichte, ok die in het spatbord, want doar zaten gaten in van wel vief centimeter deursnee. Mar det was heel simpel, want bie die olde spatborden ko’j makkelijk overal biekomm’n en met wat kippengaas, kraant’n papier en een bussie polyesterplamuur, ha’j de gaten zo weer dicht. Bettie met de verfroller ongeveer dezelfde kleur varve der op en de auto was weer een joar APK e’keurd. Mar ja, op een gegeven moment dan was de auto zoverre kapot det repareren de muujte niet meer was en dan kocht ie weer een aandere auto veur een paar honderd guld’n. In die tied reed ik ok nog illegaal op LPG. Det was mooi goedkoop toer’n! Het noadeel was wel, det bi-j iedere APK de hele LPG installatie der uut mos. Teeg’nwoardig bint de auto’s wel oardig better ( en duurder!) en heb ik det probleem niet meer van gaten in de spatborden deur roest. Die spatborden bint teeg’nwoordig, net as de bumpers vake van plastic. De auto’s van noe, bint wat det betreft net Tupperware deuz’n. Doet mi-j det mooie glimmende chroom mar van vrogger. Wel meer wark mee, mar veulle mooier!

Tut de volgende keer!

Gegroet,
Hendrik van de Steege