DALSEN – Tjonge luu, wat heb ik e-lachen gisteroamd in oons theater de Stoomfabriek bi-j de veurstelling ‘Dalfsen, het eerlijke verhaal’. De hele veurstelling van alle artiesten was in oonze mooie streektaal, dus doar wol ik dan natuurlijk weh graag bie weaz’n.
Brandweerman Jan Wittenberg begun disse oamd en had een mooie presentatie met plaaties op zien computer mee. Hi-j vertell’n van alles oaver zien beleavenissen as brandweerman en brandpreventie veurlichter. Zien opa was brandweer, zien va was brandweerman, dus mos hi-j automatisch ok ma bie de brandweer. Zien eerste brandklussie joaren geleden, was det e bi-j een grote braand mos mee help’n bluss’n. Hi-j mos van zien commandant toen een paar gele kratties met broene flessies die an de kant stond’n, goed nathoal’n, dan bluss’n de andere collega’s ondertussen de rest van de braand en zo konden die broene flessies dankzij zi’jn heldendoad noa afloop nog weer gebruukt word’n. Natuurlijk had zien verhaal ok serieuze kaant’n en ko’j metiene leer’n wat a’j wel en niet mut doen as ie een vlamme in de panne hebt.
Bertus en Wim uut Oldluu’s’n hadden ok al van die prachtige verhaal’n en liedties der bie. Zi-j hadden een mooie verhaal oaver joaaaren geleden, toen de Vechte hier en doar nog niet zo breed en nog niet zo diepe was. Toen leup der an de Hessumse kaante van de Vechte een grote bolle (een stier dus) in het laand en die roek’n det de pinken in het laand an de Oldluuser kaante van de Vechte beheurlijk tochtig waar’n. De bolle zwemm’n zo de Vechte oaver um de pinken te dekken en ging netties weer terugge. De Oldluuser boer van die pinken wist weh det die bolle zwemm’n kon en hoev’n zo gien dekgeld te betaal’n. Teeg’nwoordig is Bertus buschauffeur en hef doar een mooie buukie oaver e-schreem’n. Natuurlijk kwaam der in de veurstelling, noast de mooie verhaal’n oaver Wim zien va, det ok langs in disse hilarische veurstelling.
Afsluuter was Duo Höllenboer uut Luttenberg, die ken ie vaste nog weh van det liedtie “Bussie kump zo”. Ok zi’j hadden’n noast grappige liedties ok hele mooie verhaal’n oaver Florence Nightingale, maar ok oaver det Luttenberg vrogger ‘t Lo’ heet’n en een Lo is niks aans as een gedeelte van een stuk bos wat um’ehakt was en doar maakt’n ze dan een plaasie van woar mensen woon’n en werk’n kond’n. Zie hebt doar een mooi liedtie over e’schrteem’n, det goet oaver andere Loo’s: Busselo, Weerselo, Almelo enzovoort. En wat wi’j zelf niet iens deurhebben, mar in oons mooie dialect hej een makkelijk en kort begroetingswoord: ‘moi’. Wi’j zegt namelijk iederene goejendag met dit woordtie. En ok doar hadd’n ze een mooi liedtie oaver.
En zo vleug die oamd umme en ik hoape det der in de gemeente Dalfsen nog veulle vaker diealect veurstellingen op diverse plaats’n goat komm’n, niet alleen in meert.