LEMELERVELD – Teegnwaorig kuj mangs bie autorodeo’s gaon kiekn. Doar binter luu bezig umme hun auto’s met gank in menare te rien. Wat ze dur leuk an vint is mie ait nog un raodsel. Zie binter tiedn mee bezig umme die auto’s klaor te kriegn en soms bin vief minuten lig de hele auto an stront in menare.
Toch binter vake un bult mense die graag gaot kiekn bie zo’n autorodeo. As det dan zo is wult de autobestuurders de mense die komt kiekn ok wat te zien geemn. Ut mooiste is assie gloepens hard un andere auto kats onderste boom ried. As die andere auto dan op de kop kump en ok nog in braand is det mooi um te zien. As de auto die onmeunig hard durinne knapt is,
zelf ok nog weer achteruut kan en gewoon weer verder jaagn is det juust mooi.
De auto’s bint allemaol heel erg beveiligd, aans maagt ze helemaol niet meedoen.
Tis natuurluk niet leuk aj mut zien detter autobestuurders offevoert mut wurn met un ambulance, umdet ze net as de auto kats in de kreukels ekom bint.
De mense die komt kiekn mut mangs lange wachn, veurdet ut spul verder kan jaagn. Eerst mutter wrakn en andere pruttel oppe ruumt wurn van de bane, zodet de wedstrijd weer verdan kan gaon.
Aster un tribune is kunt de mensen mooi gaon zitn asse meu in de biene wurd. Aster gien tribune is kuj hen en weer gaon loopn met ut ophaaln van etten of drinkn. Daor muj dan weer van nor de plee en zo bliefie ant loopn en zult oen biene minder meu anvuuln. Veur de meuigheid kunnie un stoel of iets aans metnem um op te gaon zitn. Mar stoeln meeslepn is wel un heel gedoe en tis mar de vraoge offie die wel mee mag nem. Dur bint van zitstokn die ze bie ut visn of golven wel gebruukt, mar die muj dan eerst zien te vin. Un kerl lup bie zien huus rond te zuukn en zag un opklapbaar campingstuultie. Dan zittie wel erg leege bie de gronden assie dan niet veuran kunt zitn, kuj nog gien zak zien. Toene in paar fietszadels zag lign, kreege un idee.
Hij kon un paar wandelstokn regeln en asse ut handvat durof kan haaln, konne de zadels durop zetn en goed andreien.
Hij kon de hoogte ok nog regeln en zo hadde un mooie zitsteun, diej ok nog makkeluk kon meenem.
Un gat in de markt of un concurentie veur de andere zitgereien?
