LEMELERVELD – Un kerl kreeg bienao un hekke teegn zien baste an. Un rechtopstaand hekke kwam te valn toene net daorveur zich bukn umme wat op te pakn. Iemand waarschuwn hem det ut hekke ummesotermietern. Hij sprung opziet, mar ut hekke raakn zien scholder nog iets en hij had un wuntie an zien erm wat nogal gunk bloeden. Twas un zwaor iezerenhekke en gelukkig hadde niet ut hele hekke over zien baste had.

Noe eem de verbandkiste derbie en lapn umme zie erm henneknupt teegn ut bloeden. Iemand die dur ok bie was zei veur de gein dette wel wol hechten, mar de kerl zei daorop dette gien zelfmoord wol pleegn. Umdet ut wuntie nogal uut menare gung is de kerl toch mar eem nor zien dokter egaone waore drie heggies kreeg. Ok zien scholder had un grote schaafplekke. Daor krege ok verband op, aans zolt an zien kleern bliemn plakn. Hij kon ok niet in de blote baste zo weer de straote op. Hij zei teegn zien dokter det zien vrouwe wel zol zegn: ‘Wat hei noe weer edaone?” asse thuus zol kom. Zien vrouwe was ok nog un ehbo’ster. Toen die zag hoe de dokter de boel had verbunnen, had ze gelieke commentaar det ut better kon. Dus ja hoor ut verband wurn dur offehaalt en zie zolt better doen. Det klonkt raar mar ja assie altied hebt eleert op de ehbocursus hoet mut, wujt zelf ok doen ast kan en veural commentaar hemn hoet un ander ut dut. Ach de kerl wol zien vrouwe ok niet ofkraakn en leut heur mar anknooin. EHBO’ ERS muj in ere haoln, toch?

Ton