LEMELERVELD – Bie ut helpn van un imker duurn ut toch langer dan verwacht. De imker had an de kaante van un stuk grusland zien bijenkassen staon. Det waarn un paar gewone kassen en un stuk of wat kleinere. Hij wol die kleinere kassen noe ummezetn in gewone kassen, zodet die dan meer ruumte kreegn. Hij dacht detter vief kleinere kassen waarn en hij had ok ut spul daorveur mettenum.

Zo hadde genog raampies bie zich umme ut goed te kun doen. Toene an kwaamp bie zien bijenkassen zagge detter zeum kleine kassen waarn en hij wol a begin te vleukn, mar heuld zich op tied in. Noe mosse weer op huus an um nog meer raampies en grotere kassen op te haaln.

Hij had zien auto miln veur de bijenkassen nerezet met de deurn open en ie kunt wel naogaon dette noe allemaol bijen in de auto zaatn. Veurdette nor huus kon um de andere spuln op te haaln mosse noe met veegn en rookn zoveul mogeluk bijen uut de auto zien te kriegn en det duurn nogal effies. Toene eindeluk de spuln kon ophaaln en weer terugge was  hadde ok nog verkeerde grote kassen mette num, want de kunstraampies waarn te groot veur die kassen. De laatste twee kleine kassen mossen dan mar later ummezet wurn nor un grotere kas. Hij wol nog gauw eem zien auto dreien int grusland en reed met gank un grote waterplasse in. Dus ie kunt wel naogaon watter gebeurn: hij kwaamp vaste te zitn.

Dur woon un boer kurt bie en de hulpe wol al eem gaon vraogn of de boer met de trekker eem wol helpn. De imker wol echter zien name hoog haoln en gunk zien zeune beln of die hem uut de waterplasse wol slepn. Det duurn ok un zettie en al met al duurn det umme zetn van de kleinere kassen nor grotere kassen toch veul langer dan edach.

Ton