LEMELERVELD – Un older stellegie hef bienao allebeide pensioenlleeftied en hef dan ok tied um saam op pad te gaon ens hen. Um dan niet hen weer te mutten jaagn haan ze dach umme un caravan te gon koopn. Ze haan vrogger al eerder zo’n ding ehad, toen ze nog met de kinder op pad gung. Um det het leem toen duurder was veur hun hebt ze det ding vort edaone.

De kosten veur stalling en onderholt woln ze graag bespoarn. Ze haan die caravan over enum van un familielid. Umdet ze ut gemak noe ewent waarn en niet weer woln klooin met un tente hebt ze toen un vouwwaagn ekoch. Daor bint ze un paar jaor mee  vort ewes, mar umdet ut slaopn mangs niet goed wol, hebt ze die ok weer vort edaone. Noe der gien wichter meer mee gaot en ze meer tied hebt um vort te gaon wult ze weer met un caravan ant slepn. Ja en ai un caravan wult metnem, mut de auto die mut slepn ok gien klein koekblikkie ween. Ai dan zo’n lichte auto hebt muj ok un andere auto hem. Dus ut wurdt dan toch un dure zake, mar ie mun ut zien as un investering veur de toekomst. As ie older wurdt muj gaon genietn aj dur tied veur hebt en ait kunt lien.

Ton