LEMELERVELD – Un kuppeltie, gewoon man en vrouwe, haant int heufd umme is te gaon kiekn in Denemarkn. Ze waarn al is in Frankriek ewes en ok in Tjechie en Italie. Daor wurd met gemak noe veuls te werm. Toen gung ze met de tente ant knooin. Later met un caravan, mar det wurn hun un bettie te duur met de stalling ent onderholt.

Dus toen mar un vouwwaagn num. Det vunt de vrouwe met slaopn waardeloos en ja ai oen rugge vernageld deur in de vakansie in un pokkeberre te slaopn is det niet zo’n goed plan. Dus ok mar weer vort termet. Noe kreegn ze ut plan um un camper te huurn en dan in Denemarken te bekiekn hoet gunk daormet. Alles is nieuw dus alles uutprobeern. Dur was un chemisch toilet bie wat un potta potti wurd enuumt

Daorbie hei un onder- en boombak. De onderbak vangt ut gedoe op wat iemand kwiet wul.  De boombak daor zut water in umme te spuuln en dur zit un schoeve det ut stinkgat aofslut waordeur ut gedoe in de onderbak kump. Toen de vrouwe ’s nachtens mos piesen op de potta potti begon ze gelieke te klaagn det de boel al vol zat en vrueg dan ok an de man offe de boel wel goed klaore zet had.  Wat bleek noe,  de volgende morgn gunk de man kiekn watter noe met de potta potti an de hand was. Nog bienao niet gebruukt en dan al vol? Det kon nooit . Hij zag dan ook det de schoeve nog dichte zat. Dus de vrouwe un rooie kop det ze det zelf niet had bedach. Toen kreegn ze ok nog gedoe met ut berre. Uitklapn gunk mooi, mar inklapn gaf meuite. Ze woln niet gelieke te hard gaon ropn ant berre en hebt toen  ebelt met verhuurder van de camper. En net toen zie die an dr telefoon haan, kreeg de man vant stel un idee en ja heur ut berre kon noe inne klapt wurn.  Daor haan ze met zien beiden toch lange norre zug. Ast de tied mar kreg kump ut vanzelf goed.

Ton