LEMELERVELD – Un mense is un bult tied neudig um te zitn. Ie kunt ok aans nuum. Hang op de banke, int gevang rondhangn of um goed hem zitn. Mensen met un kantoorbane of van die computerluu bint hele uurn met hun baterije hun stoeln ant belasten. Assie in de pauzes eem un entie gaot loopn of zoiets is det wel better veur oe. Aans wuj alsmar stiefer.

Ok zuj dan better ant werk gaon en der vind oen baas prettiger. Dur bint al bedriem die beweging in de pauzes wult hem en det raod ze iederiene ok an. Dan wurter wel beweging van lief en leden bedoeld, want int transport bij volop in beweging mar hangie achter ut stuur. Veural oldere mensen mut zurgen det ze genog beweging kriegt, aans valt ze ok nog in slaop in de stoel. Ai dan genog beweegt, wuj daor muu van en wat goj dan doen ….? Ja zitn umme weer uut te rustn. Ok as mensn int heufd of emotioneel met de boel in de knup zit, mut ze eem gaon zitn umme te verteln watter an de hand is. Mangs met un kuppie koffie durbie en det kuj meuluk op drinkn assie op de rugge ligt. Assie derbie gaot zitn bennie makkelijker umme contact mee te hem. Ie kunt nie gelieke weer vortloopn, want ie mut eerst nog opstaon. Ie kunt wel met de manier waarop ie dur bie zitn laotn zien hoe offie oe veult.

Ton