LEMELERVELD – Ens int grusland lag un boom, die umme zotermietert was. Die boom lagter al un zettie en twun tied dette oppe ruumt mos wurn. De kettenzaage dur bie ehaalt en dan ketteneulie  en benzine durin edaone, aans kuj heel niet zaagn ja. Ant zaagn en nao un tietie zagge det ut duppie van ut eulietankie vort was.

Gelieke ant zeukn waor det pokkeduppie ebleem was. Mar niks heur, nens te vin. Dan mar de winkel umme un nieuw duppie te haaln. Daor krege te heur det die eerst besteld mos wurn. Un paar wekn later hadde eindeluk ut duppie kreegn en konne ant zaagn. Noe wolle begin mar dur was niet genog benzine, want ien tankie met benzine was lange niet genog. Nor de benzineboer umme meer benzine te haaln en eindeluk konne ant zaagn. Met un dik half uur hadde de boom kapottezaagt. De zager had un shovel bie zich, waore ut holt mee kon weghaaln.Toene de bak vol had zei de baas dette ut holt mar bie zien huus mos neerkiepn. Hij had de bak noe leug en mos nog nor un andere boom in un ander grusland jaagn, mar de shovel had kuurn en wil iniens niet meer veur of achteruut. Hij beln de baas watte daor mee an mos. De baas vreug offe de handrem dur wel offe hadde haalt. En inderdaad de stommeling had de handrem dur nog op staon. Toene die dur offe haalt had konne weer verder jaagn. De andere boom in det andere grusland lag umme zotermietert over de afrastering. As de baas peerden in det grusland wol jaagn, mos de afrastering eerst trechte maakt wurn. Dus mos die boom kapotte zaagt wurn, zodat ut draod weer strakke espan kon wurn.

Weer un bak met brandholt.

Ton