LEMELERVELD – Assie un peerd wult metnem nor un veiling mut ut in un peretrailer. Noe wast zo det un peerd met un veuln in de trailer mos. Ut veulen det kuj nog wel de baas, dus det koj a gauw vasteknupn veurin de trailer. De merrie zol  zo durachteran de trailer inloopn wurn edach. Mar det leup toch iets aans. De merrie bekeek ut toch ietsie aans.

Die wol misschien un veul mooiere trailer waore in wol stapn. Dus de trailer instapn, hadde kats gien zinne in. Ut veuln gaf al an det zien moe zich niet zo mos ansteln, mar det hulp ok kats niet. Dur wurn un emmer met brukkies veur de nuese van de merrie haoln. En steeds asse daorvan wol etn heuln ze de emmer ietsie durvan oaf. Met de bedoeling dette durachteran gunk loopn.

De merrie dachter al over um de diernbescherming te gaon beln deur det gepest. En durachteran loopn gebeurn mooi niet, want de merrie dacht al det ze heur veur de gek zoln haoln. Noe wurn de veurpootn op kleppe van de trailer ebeurt, zodette dan deur zol gaon loopn. Det hulp ok al niet, want de merrie deut a rap un stap terugge. Toen wurn dur met un touw achter um de konte geprobeert de merrie zo op de kleppe te kriegn. Ut touw was te kurt, dus wurn dur un sjorband epakt wat ok niet echt hulp. Ik denk det ze gewoon de sjorband volledig haan murn gebruukn. Dan koj zo de merrie de trailer insjorren. Ok wurn durover na edach um met un shovel waarop un baal stro zat en dan de merrie zo de trailer in duwn. Mar ut veuln gaf weer un keer an det de merrie zich niet zo mos ansteln en gewoon genoegn mos nem met de trailer die dur noe stond en niet zo mooi was. Dus eindeluk gunk de merrie met veul tegenzin toch de trailer in, um van ut gezeur van ut veuln aof te ween. De mensn die dur mee ant knooin waarn ,zuchtn vol opluchting. Ze haan niet verwacht det ut zo’n gedoe zol geem. Toch gebeurt vaker det bie laadn van vee in un trailer dur hele toestanden kunt gebeurn.

Ton