LEMELERVELD – Ai meuluk te verstaon bint, mujt mangs herhaaln waje zegt hebt. Det mak ok gien zak uut,  want ie wult toch graag det de boskop over kump. Det herhaaln kump ok veur bie andere zaakn. Op de televisie wurter films veule herhaalt. Ik vraoge mie dan aof of die filmluu dan in vredesnaam niks mee uutvoert. As die luu bezig blieft en doet watter van hun verwacht wurd, kriej toch andere nieuwe films.

Ut maakn van un film kan lange duurn en kost mangs ok bakn met geld ,mar as die filmluu gewoon ant werkt blieft mut det toch iets oplevern as allenig mar olde films weer uut ut magazijn haaln. Assie un film weer kunt zien levert det weer extra geld op, mar un mense wul ok wel iens wat aans. Un oldere kerl zat met un andere kerl in de auto en kwaamp veur de zoveulste keer in un klein durpie in Drente. Steeds asse bie de kerke int durpie kump, beginte ut zelfde verhaal over de klokke te verteln. De andere kerl kent verhaal van veuren tut achtern. Toch wurn ut steeds herhaalt en de kerl die ut steeds mos anheurn wol ergens wel gaon verteln det de dorpsluu un gruweluke hekel an die rot klokke haan. Mar hij was bange det de oldere kerl dan helmaol vant rabat zol raakn. Hij zol kats niet begriepn det un grappie was.

Mensn die vant rabat raakt kump noe steeds vaker veur bie mensn die older wurd. En det ok nog herhaalt.

Ton