LEMELERVELD – Teegnwaorig hebt mensen vake un telefoon op zak. In de burstzak of de kontzak, want dan kuj dur rap bie aj ebelt wurd. Mar ut gevaor is dan wel dette kunp te valn of weggejat. Ast bie valn blef kan dur schade optreedn zoas, un kapot scherm. Ast un klein barssie is kuj durmee verdan, mar ast un grote barste is muj un ander scherm drop laotn zetn.

Iemand hadde dacht um un leern tassie te laotn maakn bie un schoenmaker, waj zo an de broekriem kon maakn. De schoenmaker hatter un paar drukknoopn anne maakt, zodei ut tassie met un kleppie zo dichte kon doen. Door hadde wel goed over nao edacht. De gebruuker vund biet gebruuk van det tassie dette muite had biet ut pakn van de telefoon en daornao weer terugge doen. Dus hij gunk zelf iets aans verzin umme det tassie te gebruukn. Eerst hadde ut tassie op zien dwarsen an de riem en noe ginge ut in de lengte an de riem hang. De zietkante snede lus en dan konne de telefoon zo van boom in ut tassie laotn zakn. Det gunk rapper as eerst die drukknoopn lus doen. Nao un tietie zo eloopn krege ajt rommel in det tassie, umdet die nao van boom lus was. Umdet de kerl vake un grote bek kreeg asse zich umme gunk kleedn thuus, aster weer allemaol rommel op de vloere kwaamp deur det tassie. Hij bedacht toen umme ut tassie dan mar weer op zien dwarsen op te hang an zien riem. Marja noe hadde un open veurkante en dan kon de telefoon dut zo uutzeiln. Mar det mut toch met klitterband op te losn ween. Dus hij ant knooin met stukkies klitterband vasteliem um zo de veurkante dichte te maakn. Mar op verloop van tied leut de liem alweer lus, dus dan mar weer an menare neien die zooi. En zo kwaampe weer terugge zoasse begun was. Gien rommel meer durbie in. Det bevult tut nu toe better. De schoenmaker had ut toch better bekeekn as de gebruuker zelf.