LEMELERVELD – Un stellegie reed op un mooie zunnige dag in de auto op un rustig landweggetie. Iniens zeg de vrouwe det ze wat op de weg zut lign. De kerl zut ok dette un paar fietsen an de kante van weg neregooit bint. Aj niet goed oplet kuj dur zo overhen jaagn. De vrouwe zeg teegn de kerl dette eem mut stopn assie un paar jochies bie un maisland zut staon bie die fietsen in de buurte.

Zie dreit ut raam lus en begint mie daor van zich of te bekn det die jongs as de sotermieter die fietsen van de weg mut haaln, anders… Ien van die jong stond net van zich of te zeikn en schruk van det gebleer zodette de hele broek noe strontnat had. Ut andere joch begon te bruln van schrik en wus van narigheid niet watte noe mos doen. Hij leup noe met gank de mais in met ut idee dette zo kon ontkomn an wattum anders te wachten zol staon. Ut joch met de natte broek begon ok te bruln umdette zich de oogn uut de kop schaamn deur zien natte broek. Hij was al un poosie zindeluk en asse weer thuus zol komn zoln zien va en moe weer luiers mun anslepn. Ut joch in de mais zol daor kun bliem zitn tutdet ze gaot meien en dan mutte uutkiekn dette niet in de maiswaagn trechte kump. Mar de kerl van ut stellegie waarschuwn zien vrouwe durveur det die jong glieke de kindertelefoon zult gaon beln um te klaagn over die manier van bekn. Det was een aanslag op hun geheur. Ze haan gien oorbescherming op en asse de fietsen helemaol in de berm mossen legn, zoln die helemaol smerig wurn. Ze zoln dan die fietsen weer op mun poetsen en daor haan ze kats gien zinne in.

Ton