LEMELERVELD – Dur kump ait un tied dej van oldere pruttel of mut zien te komn. Meestal oldere luu hebt daor meuite mee. Zo kant gebeurn dei un huussie op de camping hebt waorie a jaorn lange met plezier kwaamn. De moderne campings wult vake van de olde huusies en caravans of en die wulter vake nieuwe huussie veur in de plaaste bouwn. Daor kunt ze dan better an verdien.

Assie dan aofscheid van oe huussie wult nem mut det eerst leugehaalt wurn van alle pruttel die in al die jaorn verzamelt hebt. Ie kunt de kringloop laotn kiekn of die nog wat wul hem, want dan kommie dur mooi van of. De rest kuj mee nor huus slepn um ut later uut te zuukn. Mar assie det doet blief ie met die pruttel zitn, diej kats niet meer neudig hebt. Dan verzamel ie van allerlei pruttel waorie op den duur toch van of mut, want um thuus alles te bewaarn daor hei helemaol gien ruumte genog veur. Ie kunt probeern  um via marktplaats dur van of te komn. Ok oen familie kan nog wat wuln hemn. Ast al older spul is kuj zelfs un museum begin en dan mar hopn det ze bie oe de deure plat gaot loopn dan kuj ze ok nog koffie gaon verkoopn. De kans bestiet det de spuln diej jaorn lange verzamelt hebt allenig mar riepe is veur de afvalcontainer. Tis wel meuluk um alles zomar weg te mietern, mar int heufd gef det un better geveul assie de zake of kunt sluutn.

Ton