LEMELERVELD – Un kerl wol met  un landbouwtrekker eem ens hen jaagn. Ut geval wol gewoon startn en hij kon dur ok gewoon mee rien. Hij mos over un stuk weg waor ok ander verkeer kon ween. Hij gaf goed gas zodette op tied te plaaste zol ween. Hij was al un stukkie onderweg toen iniens de knalpiepe dur aof vleug. Gelukkig waster verder gien ander verkeer in de buurte.

Want stel oe veur detter fietsers of zoiets te passe zoln kom met zo’n hiete knalpiepe. Det wuj niet metmaakn, dan zuj ok nog nor ut ziekenhuus mun um die slachtoffers te bezuukn. Veur de aorigheid wuj dan un bussie bloemn meenem, mar umdet bloem vake onder allerlei chemische rommel zit kuj die niet in un ziekenhuus metslepn.  Dus dan mut mar un fruitschale wurn. Dus un hiete knalpiepe die dur aof vleug kan tut heel wat gedoe

komn. De kerl gunk gelieke op de rem staon en zag det de knalpiepe ens in de berm was nerekomn en daor wasse wel bliede mee. Asse op de weg trechte wasse kom, kon ander verkeer watter achter hum an kon komn durover hen boltern. Dan kon de knalpiepe kats nor de klootn ween of umdette hiete was kon det verkeer wat de knalpiepe kats plat erene had ok nog schade kriegn zoas lekke bande. Mar umdette noe gien last had van ander verkeer mosse die hiete knalpiepe opraapn um die met te nem. Hij wol al in bos watter naost de weg stond op zuuk nor takn um die hiete knalpiepe te verplaatsen. Toevallig kwaamter un bekende met de auto anrien. Hij begon te zwaain dette hulpe neudig had en die bekende had un parteie doekn bie zich waore de knalpiepe mee kon oppakn en in de auto metnem. De kerl kon noe weer verdan met un bonke lawaai en kreeg ok un bonke rook in de snoete. Det was mar veur effies aans zolle dur ok nog wat an kun overhaoln. Dan zolle zelf misschien un fruitschale kriegn. Die knalpiepe moster later mar better anne knooit wurn, zodetter gien fruitschale neudig bint.

Ton