LEMELERVELD – Un kuppeltie gunk op vakansie met de caravan waj ok sleurhutte kunt nuum. Ze haan un mooi plekkie efun en zetn de boel neer en toen ze klaor waarn met uutpakn, kwaamter un ander kuppeltie naost hun staon. Die haan ok un hond bie hun. Die hond wurn an un paoltie knupt umdet ze eerst druk waarn met uutpakn.
De hond gunk gelieke mar is eem op onderzuuk bie de buurn kiekn. En daor lekker lign stond tum veul better an as bie zien eign parkeerplekkie bie det paoltie waor zien baasum an vaste hadde knupt. Ut stellegie van de caravan waor de hond noe gunk lign, dach gelieke al: “Noe mow met ut bosschoppen doen ok nog hondevretn met nem um toch un goeie band met de naoste buurn te kriegn”. Ie kunt slecht toegeem an oen gedachten toenie die hond bie oen caravan zaagn lign um die hund un onmeunige trap te verkoopn en de nieuwe buurman ut commentaar te geem dei dur niet op zit te wachtn det hun hond de boel bie oe zol onderscheitn. As de nieuwe buurman toevallig ok nog van de dierenpartij zol ween hei de popn helemaol ant dansen.
Mar gelukkig toen ut stellegie van die pokkehond klaor was met ut uutpakn van hun pruttel, reupn ze de hond terugge en verduld ut biest luustern ok nog. Kindern die ok op de camping waarn zaagn de hond en von det un leuke aofleiding en woln ut biesie wel aain. Zoas alle hondebeziters de opmerking: ‘Hij bijt niet hoor.” “Ja oe nie” muj dan zegn. De buurn met die hond bint a rap weer vort egaone. Dan giet ut eerste stellegie toch denkn of ut toch niet an hun ligt det die buurn zo rap a weggepest bint. Ut gedrag van hun is mangs un bettie vremd, mar um kotsen in de struukn noe direkt vremd te nuumn of van oe aofpisn umdet ze gien zinne hebt um un paar meter te loopn nor de plee. Ie kunt gaon redeneern dei op de camping miln in de natuur bint en wildplasn is dan allenig aj onmeunig tekeer gaot aj ant aoftapn bint
En ut pisn in de struukn gunk mooi hennig an, dus daor kant ok niet an lign.
Misschien had op de koffie vraogn kun helpn, mar hun haan ok kun vraogn of ze koffie woln hemn. Tis mar net de vraoge wie dur begint met det koffiegedoe. Ie kunt ok zomar un wildvremde op de koffie kriegn die gelieke over politiek begint te oewehoern en daor zit toch niemand op te wachtn , want de politiek maakter ok un zooitje van. Mar wat hun doet kan ok op de campings gebeurn. Op vakansie muj alles niet ze nauw nemn, thuus kuj weer lekker bekn op menare. Noe hei vakansie en kuj oe mooi ergern an de buurn of gewoon koffieleutn bie menare.