LEMELERVELD – Assie umme ut huus allemaol stien heb lign, mut die stien dur wel goed in bliem lign. Assie dur dan overhen kuiert, mut oe niet overkom dei dan deroverhen struukelt as die stien hier en daor ongelieke bint kom te lign. Ie zult met oen snufferd op de straote trechte kun kom.

Dan hei ok kans det de straote   onder ut bloed kump te zitn en dan muj ok nog met water en un bezum det gesmeer weer haaln. Ut stiet niet as de buurn kunt zien detter bie oe un bloederig gedoe an de gank is. Deurumme kuj better die stiene weer mooi glad der in maakn. Dan muj de stiene die dur noe verkeerd in ligt dur uut haaln en un bonke zand duronder maakn. Ast goed is mutter nog un kladde zand in un emmer in de schure staon. Mar tis in de schure un aorige bende. Noe muj van narigheid bienao de hele schure leug ruumn umme dan eindeluk de emmer met zand te kun vin. Ie ziet a rap det ut veuls te weinig zand is en dan muj eerst zand dur bie ophaaln. Ie zoln uut de tuun zand kun haaln, mar det is gien mooi staotzand. Umme ut goed te  zeilndoen muj noe nieuw zand ophaaln.

As det zand eindeluk is oppehaalt kuj dur mee aan de gank. Un bulte stien dur uut knooin, zand duronder en de stien dur weer inhouwn. Noe kuj met gemak weer umme ut huus hen en weer kuiern zonder onderuut te zeiln en oen broek kats nor de pleuris te helpn.

Noe hei ok gelieke de schure oppe ruumt, wat hoog tied was. Ie ziet det un slechte straote metiene un bult oplost.

Ton