LEMELERVELD – Un kerl hef un stekplante in de tuun. Tis un yucca en as denne bluuit ist wel un leuke plante. Mar det bluuen is mar eempies en assie dan de tuun ant schonemaakn bint kuj wellis last hem van die stekblaadn. Met schoffeln of harkn kunt die stekblaadn oe mangs onmeunig in de biene stekn assie niet goed uutkiekt waar assie loopt.

De kerl hef ooit un plantie van zo’n yucca in zien tuun eplant an de kante van de tuun waor de buurn hun tuun ok lig. Noe was die yucca zo machtig begin te gruuen dette ok un stuk in de tuun van de buurn was kom te gruuen. Der staot van allerlei andere struukn veur, zodet ze ut heel niet kon zien det de buurn der zomar last van kon hem as die in zien eign tuun rondleup te hopsen. Die buurn haan plan met hun tuun en kwaam eem overlegn of die stekyucca niet un bettie weggeknipt kon wurn. Dan kon ze zelf in hun eign tuun rondbanjern zonder kans te loopn det ze un ambulance zoln mun beln as ze onmeunig ant bloeden zol kom of niet meer kun loopn deur allei gaagies in de biene deur die yucca.

De kerl dachter niet lange over nao en haaln metien un schuppe op. Hij spitn rap de yucca uut de grond, zodet de buurn niks meer haan te klaagn. Zo’n plante mut niet derveur zorgn det de buurn menare dwars gaot lign. De rijdende rechter zol dur ok zomar bie ehaalt kun wurn. Toen de kerl dermee bezig was um de plante deruut te spitn kwaamp de buurman zelfs eem helpn, zodet ze saam de stekkereie annepakt hebt. Noe de gruune container durbie ehaalt en ant knipn zodet dur zoveul mogelijk in kon.

Ton