LEMELERVELD – Iemand die mag graag  de tied stekn in puzzeln. Steeds mar bliem zuukn nor ut goeie stukkie watter an past. Zie zegt ait dej in de hoekn mut begin. Noe is iemand bezig met un grote puzzel en die hef ok bienao de hele taofel neudig. Mar noe binter ok andern die de taofel neudig hebt en dan kuj de puzzel die dur dan opligt niet zomaar weghaaln.

Dan zoj alle stukkies, die noe a netties op de plaaste ligt ,weer deur menare kriegn. Det kan dan un bulte trammelant veroorzaakn. Umme det dan te veurkomn kreeg iemand ut idee um dan mar gewoon over de puzzel hen de taofel te gebruukn en van alles boomop de puzzel te zetn. De puzzelaar kan dan niet meer verder met zien puzzel, mar de puzzel blef wel zo asse was. An de ene kante kan de puzzelaar dan kwaod wurn, mar an de andere kante wete noe wel dette later gewoon weer verdan kan met zien puzzel. Asse mar niet gaot smeern op de taofel. Bie koffie ingietn kunt ze mangs onmeunig smeern. Asse dan weer verder kan met puzzeln zit de stukkies onder de smeerdereie kregge smerige handen en mutte weer stopn met puzzeln umme de klauwn te wasn. Asse dan net zut waor of un stukkie anpast mutte eerst nor de krane en asse dan terugge kum kant vergetn ween waor det stukkie noe anpasn. Dan bei ant puzzeln in etappes. Hij had de puzzel ok op de grond kun legn, mar heit gevaor det iemand derover hen giet smakn en dan kan puzzel ok kats nor de fillistijnen raken. Dan kunter stukkies kapot raakn en dan binnie nog verder  van huus. Dan past de stukkies heel  niet meer in menare en dan kuj ut hele spul wegsotermietern. Een mooie puzzel waorie oen tied fijn an kon besteden is noe kats nor de klootn en muj iets anders zien te verzin um de tied met plezier deur te komn. Misschien un taofel dur bie koopn?

Ton