LEMELERVELD – Ach ait noe reustertie of zeefie neumt door wurd niet aans van. Tis dur veur bedoeld dei niet allerlei gerei in oen afvoer kriegt. Assie noe det reustertie daor hebt lign waor ut heurt dan muj de rommel die durop ligt wel geregeld weggooin. Aans wul ut water niet goed meer vortloopn. Ie kriegt dan in de gutstien un smeerbende. Um un volle gutstien leug te kriegn muj dan det verstopte reustertie durof haaln en dan kumpter van allerlei pruttel in de afvoer.

Dan denkie bie oe zelf: ‘mut det dan zo?’

As iederiene die in de kukn kump en mangs ant aanrecht wat te knooin hef ok det reustertie schone hult dan blef de gutstien ok goed leug. Meestal is het dezelfde die ait det reustertie leug mak. Diegene denkt dan det de andern toch gien oogprobleemn hebt, zie kunt toch ok zien det ut reustertie kats vol is en de afvoer zo gien nut meer hef. Dur kump zo niks meer in en de gutstien wurd allenig mar voller. Tis mar un kleine meuite um det reustertie leeg te maakn.

Ze zult wel denkn det un ander ut wel giet doen, die zich der onmeunig an ergert. Zo wurd de afvoer toch weer gebruukt.

Ton