DALFSEN – Dan iets oaver wandeln. Ik kreeg de vroage iets te vertelln over mien zundagmön wandelingn; noa das niet zo moeiluk. Dalfsen hef een uniek buutengebied um te wandeln en veural um te genieten van die mooie natuur. De vrogge zondagmön vind ik geweldig, weer of gin weer gewoon goan, want als ik thuus blieve reengt ‘t ok. Mooi vrog op pad, want dit is oltied ‘t mooiste deel van de dag.
Ik ben pas noa 2019 pas begunn met wandeln. Want noa een zwoare operatie mos ik mien mountainbike op advies van mien dokter loaten stoan. Dus eerst alleen korte wandelingn in de regio van 5 of 6 km, maar noa 2022 wen die wandelingn steeds wat langer. Mien doel was um minimaol 25 km in de wekke te goan haaln.
Het is veur mie gin probleem um op zundagmön om 7 uur te beginn aan een wandeling. Soms is het nog donker, mar doarnoa zie je de zunne opkomn.
Het wild zög de schuulplaatsn weer op en iej komt bienao gin meense teeng, wat een rust, dat is pas echt genietn. In het veurjaar heur ie de vogels volop fluitn en de spechen timmert er vol op lös. Noe heur je de eikels en blaan valln en wat een geweldige herfstkleurn. En elk stukkie natuurgebied is weer anders.
Het mooiste is aj vrog weggoat, daj vake nog veur de koffie trugge bint.
Wussen jullie det alleen an de zuudkante van de Vechte een groot wandelgebied is van maar liefst 11 landgoedern, met totaal meer dan 3000 bunder meest bosgrond um te wandeln. Deur de bossen van landgoed Rechtern, Hessum, Vilsteren, de Horte, Mataram, den Aalshorst, De Gunne, de Hoonhorst, de Bokkenberg, Den Berg en het Rechterenseveld van Natuurmonumenten en nog vulle meer grond van oonze boern.
Ok mooie wandelingn bie landgoedern rond Heino en Laagzuthem, een rundje langs Zwolle, rundje Oldleusen en een wandeling in het buutengebied van Nieuwleusen, Lemelerveld, oaver de Lemelerberg en rond Ommen, oaveral kuj wandeln.
Veur mie, nooit zomar wandeln, in de eerste plaatse ok zelf genietn van de natuur, maar ok om vulle foto’s te maakn, en noa thuuskomst een wandelverslag te maakn met foto’s veur Dalfsennet, um ook andern te loaten genietn van de mooie omgeving van Dalfsen.
Dat het vulle elèzen wordt is wel duudeluk, die aantalln verschilt per wandeling, maar ligt mangs tussen de 1000 en soms wel 4500 bezukers per keer met vulle en mooie reacties. Genietn van de natuur, terwijl de meeste meensn nog op iene ore in bed ligt.
Mien advies is dan ok, vrog er uut en geniet van de prachtige natuur in oe eig’n omgeving.
Dalfsen hef machtig mooie wandel mogelukheden middels het “Vechtdal wandelroute netwerk”.
Of kiek dan ook eens op de site van Greenshoes Dalfsen, voor mooie wandelingn zowel deur de wekke as in ’t weekend, zo kuj elke dag wel wandeln.
Dalfsen heeft heel vulle te bieden, geniet van elk seizoen het is oltied weer aans.
Of ’t noe mooi weer is of niet, “Ïn Dalfsen is het oltied mooi weer um te wandeln”.
Ik dank oe veur de andacht.
WvdV