LEMELERVELD – Dur mos un beukenhegge erooit wurn. Dur stond un hegge waor hier en door un dooin tussen stond. Ie kunt dan de dooie dur uut haaln, mar dan muj toch mar zien dei bettere stukn dur weer tussen in gaot potn. Mar ie wult toch wel eempies weetn weurumme die dooie stukn daor ekomn bint. Ieje ant spitn in de grond waor die hegge stiet.

Ie ziet allemaol emelten en andere pruttel waor de hegge niet goed op wul gruuin. Dus dan muj de verpeste grond vorthaaln en bettere grond dur weer inkaorn. Ai ut dan goed wult doen muj alle dooie stukn dur uut haaln, mar ok die goeie stukn mutter dan uut. Tja det lek dan zunde, mar ie mut die grond dur uuthaaln zodet ut allemaol bettere grond kan wurn. Ok ut vin van de goeie maote zal muuluk wurn, bie ut zuukn nor andere beukn veur de hegge. Umme die hegge dur uut te haaln kuj met de schuppe an de gank. Assie echter un shoveltie kunt gebruukn giet det veule rapper en oen rugge kreg ok niet zo op zien donder. Ie kunt dan met de shovelbak zo onder die beuken komn en dan opbeurn en dur uut duwn. Dur zit zelfs un klemme op de bak en assie die dan dichte klapt kuj ok nog achteruut de beukn zo duruut ropn.

Umdej zo mangs un heel stel beukn tegelieke op de bak kriegt, kumpter aorig wat gewicht op de banden vannut shoveltie. Zoveule gewicht detter iniens un lekke band daorvan kump.. Noe muj eerst de lekke band vervang veur un andere hele band die wel veul breder is. Noe mut de lekke band wel gauw weer repareert wurn, want met de bredere band kuj niet meer de perestaln uutmesn wat regelmaitig mut gebeurn. Ie kunt met de goeie banden zo de perehokn in jaagn umme zo de mest duruut te haaln. Met de bredere band kuj de bak van ut shoveltie veur ut perehok zetn en muj de mest allemsol daor nor toe slepn. Ast aans kan dan mujt niet laotn.

Ton