LEMELERVELD – Dur is un bedrief in Lemelerveld det hef un mooie traditie. Det bedrief hef ait veurt personeel un eindejaorsfeest. Dan hebt ze un grote tente, waor ze det feest dan kunt haoln. Umdet die tente dur toch a stiet, dachen ze: “Weurumme kuj daor niet meer mee doen?”

Dus kwaamp ut idee um de ooldn uut Lemerveld ok un kerstmaoltied an te biedn. Det olde spul mag dan bie menare kom in de tente en dan kunt ze mooi met menare ant neuln gaon. Olde luu hebt behoefte an gezelligheid en bie zoiets kump det mooi trechte. Det bedrief is Tielbeke en die zurgt ok veur un leuke ankleding van ut gedoe. Twas met vrachtwaagns anne slept. Un muziekbantie, de bediening was allemaol eregeld en de tente was ok goed verwermd. Sommige ooldn die veurig jaor ok ewest waarn von ut noe minder goed bezugt, want dur waarn nog un bult leuge stoeln. Tja, dan weet ze niet wat ze mist of juust wel. De kerstmaoltied was un wortel- of boernkoolstampot met worst en speklapn dur bie. Ok ut neudige drinkn waster ok genog. Tielbeke hef met die traditie un goeie gewoonte annenum.

Ton