LEMELERVELD – In disse tied kumpter un bult sneeuw nor beneden. Deur ut winterweer ligt metiene ut hele land plat. Wiele bint niks meer ewent. Umdetter de leste jaorn bienao gien strenge winter meer ews is, weet wiele van narigheid niet meer hoei daor mee mut umme gaon.

Op ut vliegveld mutter noe rap bedn anneslept wurn, want alle slaopplaatsen in de buurte bint a rap verzegd. Schiphol mut dan zurgen veur bedn, etn en zo rap mogeluk un oplossing zien te vin veur al die luu die graag verdan wult. Aster dan deur sneeuw gien vliegtuug meer de lucht in kan, mut ze gewoon aofwachtn. Ok zulter un bult kosten bie komn asse de annuleringen mut vergoeden. Bie ons in de tuun kwaampter ok zomar un sneeuwpoppe ankroepn.

Normalerwijze kumpe anloopn, mar hij hef helemaole gien biene. Daor gok dan van uut, want die kan ok nog onder de lange jasse zitn. Mar ik zage gien voetspoorn in de sneeuw, dus dan trek ik de conclusie det op un andere maniere daor ekomn is. Mar dur wurd vake zegt dei dur niet an mut komn ait niet vertrouwd. Dus ik haole mien hande thuus en denke det ut zich vsnzelf wel oplust. Ik zal um goed verzurgen met koffie op zien tied en hij mag ok nog welmee etn, want wat schiphol kan kan ik ok.

Ton S.