FRANKRIEK – Wussen jullie dat d’r, naast de Oostenriekse Dalfsenaren, ok nog een old-inwoonster uut het Dalfser Emmen  in Frankriek zit? Femmy Visscher hef daor een prachtig stekkie opbouwd. Ik bin d’r zelf west en ik kan oe zeggen: ’t klopt helemaole. Op ongeveer zo’n zeuven uur rieden van Dalfsen, mooi um efkes te stoppen as ie op weg bint noar ’t zuden.

In ’t rustige dörpien Arbigny-sous-Varennes, in de streek Haute-Marne en zo’n twintig minuten van de Route du Soleil, lig een kleinschalige camping midden in de natuur. Femmy runt die samen met heur vriend Rob.

De sfeer is d’r gemoedelijk: veul rust, ruumte en weinig gedoe. Gien massatoerisme, mar gewoon genieten van ’t Franse platteland. D’r bunt ruume plekken en ok een yurt en twee pipowagens te huur, allemaole met een eigen butenkeuken.

As ’s aovends de duusternis invalt, heur ie haast niks meer. Alleen de plofkurken soms. Echt donker en stil, zoas dat hier haast nich meer te vinden is. Dat maakt ’t juust zo mooi.

Rob kokt geregeld veur de gasten. Gien poespas of dikke menukaarten, mar gewoon eten wat de pot schaft. Met mekaare an taofel zitten zorgt veur mooie gesprekken en een ontspannen sfeer. Ding van vrogger ophaaln. En ai der op woensdag komt dan krei der pannekoeken te etten.

Daornaost is d’r ok nog “La Maison de ma Tante”, een sfeervol old Frans huusien waor ie echt ’t gevuul kriegt van vroeger op ’t platteland.

Al met al een fijne plek um wat langer te verblieven of gewoon veur een overnachting op weg noar ’t drukkere zuden. En zeker aj dan ok nog kundig volk aantreft. Ai plaaties wult zien muj eem hier op druk’n.

Boes uut Dalfsen, hij sprekt uut ervaring.